Transmetimi i gazit, ERE i refuzon Albpetrolit licencën, nuk plotësoi kriteret
Albpetrolit ju kërkua që përpos dokumenteve që kishte vënë në dispozicion të paraqiste edhe një sërë dokumentesh të tjera. “Me shkresën nr. 348/1 Prot, datë 05.06.2019, ERE ka përcjellë pranë shoqërisë njoftimin e vendimit dhe kërkesën për plotësim të dokumentacionit të munguar, i cili konsiston si më poshtë: Vërtetim nga organet kompetente që ndaj personit juridik apo personave dhe drejtuesve kryesorë të shoqërisë tregtare nuk ka një vendim të formës së prerë për ndonjë vepër penale; struktura organizative dhe funksionimi administrativ i shoqërisë, lista e personelit sipas profilit (në përputhje me aktivitetin për të cilin është kërkuar Licenca); dokumentacioni që tregon titujt ose pronësinë mbi asetet që ka, që ka dedikuar ose ka nënkontraktuar/marrë me qera ose që pritet në mënyrë bindëse të përfitohen nga ose për Aplikantin për të kryer funksionet ose plotësuar detyrimet nën licencën e kërkuar. Lejet dhe autorizimet mjedisore sipas rastit për aktivitetet ushtrimi i të cilave kryhet me asetet përkatëse. Deklarime të lëshuara prej autoriteteve përkatëse për shlyerjen e detyrimeve fiskale dhe sigurimeve shoqërore, në masën që këto detyrime janë plotësuar prej aplikantit” thuhet në dokument.
Po kështu ERE kërkoi që Albpetrol të paraqiste një plan biznesi i cili përfshin një analizë të kostove dhe përfitimeve përfshirë kostot për largimin përfundimtar të pajisjeve dhe rehabilitimin e mjedisit me përfundimin e operacioneve si dhe sasinë mesatare të gazit natyror të shprehur në milion Nm3, e parashikuar për tu livruar gjatë një viti.
ERE ka njoftuar me një shkresë tjetër në korrik Albpetrolin që të paraqiste dokumentacionin e nevojshëm por nga kompania nuk është marrë asnjë hap duke mos kthyer përgjigje çka ka bërë që në fund Bordi i Komisionerëve i Entit të refuzonte kërkesën për licencimin në aktivitetin e furnizimit me gaz natyror.
