Vendimi i PD: Protesta të përditshme derisa Meta të japë dorëheqjen

Partia Demokratike ka vendosur të zhvillojë protesta të përditshme ndaj kreut të Kuvendit të Shqipërisë, Ilir Metës, deri në dorëheqjen e tij.

Aktivi i kësaj partie, që u mblodh në orën 18:00 në selinë blu, pas 2 orë diskutimesh, vendosi që lufta opozitare tani të fokusohet në këtë pikë, dekriminalizimin e Kuvendit dhe të politikës në tërësi, duke nisur nga largimi i Metës.

Do të jetë FRPD-ja që do të zhvillojë çdo ditë në rrethe, protesta kundër kryeparlamentarit dhe vetë drejtuesit e PD-së, deputetët e saj, të enjteve, para selisë së Kuvendit, në kohën kur do të nisin seancat parlamentare.

Ky aktiv u mblodh një ditë pas organizimit të protestës së PD-së dhe aleatëve të saj në sheshin “Skënderbej”, në të cilën u kërkua dorëheqja e Kryetarit të Kuvendit, Ilir Metës, pas akuzave publike të deputetit të mazhorancës Tom Doshi ndaj tij për vrasje të porositura.