Vendimi i Prokurorisë, lirohen 3 ish-zyrtarët e hipotekës në Elbasan
Vetëm një ditë pasi ishin arrestuar për shpërdorim detyre, 3 ish-zyrtarë të hipotekës së Elbasanit janë liruar me urdhër të Prokurorisë.
Ish-drejtori i ZVRPP në Elbasan, Altin Ago, inxhinieri Mentor Tola dhe juristja Alma Pajova ishin arrestuar nga antikrimi ekonomik, por ky arrestim është konsideruar i paligjshëm nga Prokuroria.
Burime zyrtare njëherë thanë se ata dyshohen për falsifikim dokumentesh zyrtare për tjetërsim prone.
Sipas të njëjtit burim, gjatë muajit shkurt 2015, në bashkëpunim me njëri-tjetrin dhe në mënyrë të kundërligjshme, këta persona kanë falsifikuar dokumentet zyrtare dhe i kanë dhënë dokumente pronësie me konçesion një firme private, duke bërë tjetërsimin e pronave të banorëve të fshatit Muriqan Elbasan, të cilët e kanë përfituar me Ligjin Nr.7501.
