Vlorë, vodhi 6.2 milionë lekë, arrestohet ish-punonjësja e Postës Shqiptare

Policia e Vlorës ka arrestuar punonjësen e Postës Shqiptare në Novoselë, pasi ka arritur të vjedhë  6.200.000 lekë të reja, rreth 210 abonentëve të OSHEE-së. Burimet zyrtare bëjnë me dije se Luiza Mbyeti, 50 vjeç ka ushtruar detyrën e arkëtares  pranë Postës  Shqiptare Vlorë, Filiali Novoselë për periudhën  dhjetor 2002 – gusht 2009.

Gjatë kësaj periudhe kohore ajo ka përvetësuar pagesat e energjisë elektrike që abonentët e OSHEE-së paguanin pranë Zyrës Postare Novoselë. Ndonëse vuloste dhe nënshkruante librezat e energjisë elektrike të abonentëve të OSHEE, ajo nuk e pasqyronte në listat e arkëtimeve të pagesave të energjisë elektrike por i merrte paratë për vete. Në kuadër të hetimeve të Krimit Ekonomik e Financiar rezulton se ky veprim i paligjshëm ka dëmtuar 210 abonentë të OSHEE-së Komuna Novoselë, ku të gjithë vërtetohen me librezat e energjisë elektrike dhe vërtetimet e debisë të lëshuara nga OSHEE.

Arrestimi i saj u krye në hyrje të qytetit të Vlorës, ku po lëvizte me bashkëjetuesin e saj me automjetin e tyre, nga Specialistët e Krimit Ekonomik e Financiar. Kjo shtetase është shpallur në kërkim që prej datës 10 Qershor 2015 dhe menjëherë i është vendosur masa e sigurisë “Arrest në Burg” për veprën penale “Vjedhja e kryer për shkak të detyrës”.