WWF, botim për turistët për 15 parqet kombëtare të Shqipërisë
Zyra Mesdhetare e Fondit Botëror për Ruajtjen e Natyrës – WWF sjell broshurën promovuese të 15 parqeve kombetare të Shqipërisë për turistët e huaj dhe vendas.
“Synimi ynë për të dizenjuar dhe iu ofruar vizitorëve vendas e të huaj, një përmbledhje të destinacioneve më të bukura të natyrës shqiptare është realizuar me sukses”, tha përfaqësuesja e zyrës së komunikimit të WWF-së në Shqipëri, Odeta Stavri.
Sipa saj, në bashkëpunim me Shërbimin Pyjor pranë Ministrisë së Mjedisit dhe INCA (Insitituti i Ruajtjes së Natyrës në Shqipëri), WWF sjell për adhuruesit e natyres një broshure promovuese me 38 faqe në gjuhët shqipe dhe angleze. Broshura fton publikun të zbulojnë trashëgiminë që ruajnë 15 parqet kombëtare të Shqipërisë dhe kulturën e pasur të banorëve të zonës.
Broshura po shpërndahet në pikat e hyrjes në Shqipëri, në Parqet Kombëtare, pranë operatorëve turistike në bashkëpunim me Agjencinë Kombëtare dhe Shoqatën e Turizmit. Shpesh të panjohura për shkak të mungesës së infrastrukturës nga vetë shqiptarët, parqet kombëtare janë një pasuri e çmuar dhe mundësi e shkëlqyer për të ndërtuar turizmin natyror.
WWF-i është një organizatë e pavarur ndërkombëtare për mbrojtjen e natyrës, me gati pesë milionë mbështetës dhe me një rrjet global aktiv në më shumë se 100 vende. Misioni i WWF-it është për të ndaluar përkeqësimin e mjedisit natyror të tokës, mjedisit natyror si dhe për të ndërtuar një të ardhme në të cilën njerëzit do të jetojnë në harmoni me natyrën, përmes ruajtjes së biodiversitetit botëror, përdorimit të burimeve të ripërtërishme natyrore, zhvillimit të qëndrueshëm etj.
