Zbulohen emrat që votuan kundër Bashës në Kryesinë e PD-së. 3 sekretarë abstenuan
Kryesia e PD ka vendosur dje kundër shtyrjes të zgjedhjeve për kryetarin pas 22 korrikut. Rezultati i votimit të këtij propozimi dje në Kryesi ishte 11 vota pro kërkesës së grupit kundër Bashës nga 45 anëtarë që ka Kryesia e PD.
Dy nënkryetarët e Partisë Demokratike, Edi Paloka dhe Edmond Spaho, në përfundim të afateve për regjistrimin e kandidatëve për kreun e ri të PD-së thirrën mbledhjen e Kryesisë për të përcaktuar kandidatët zyrtarë dhe anëtarët e Komisionit të Zgjedhjeve.
Lulzim Basha, i cili ka deklaruar se i ka ngrirë të gjitha funksionet e tij si kryetar i PD-së, nuk mori pjesë në mbledhjen e Kryesisë, e cila u zhvillua me debate të ashpra.
Ishin tre anëtarët e Kryesisë ata që fillimisht u kërkuan dy nënkryetarëve të PD-së të tërhiqeshin nga drejtimi i mbledhjes dhe t’ia delegonin atë sekretarit të përgjithshëm dhe dy sekretarëve organizativë.
Sa i takon garës për kreun e ri të PD-së, grupi “anti-Basha” kërkoi shtyrje të datës së zgjedhjeve me arsyetimin se fillimisht duhet bërë një analizë për zgjedhjet parlamentare për t’u nxjerrë përgjegjësitë konkrete për gjithsecilin. 
