Zbulohet statuja e “Faraonit të Madh”

Një grup arkeologësh zbuluan në një zonë periferike dhe të varfër të Kajros një statujë gjigante, të cilën ministri i Antikiteteve e cilësoi si zbulimi më i madh i bërë ndonjëherë.

Zbulimi është bërë në zonën e njohur në antikitet si Heliopolis dhe fare pranë rrënojave të Tempullit të Diellit, që besohet se është ndërtuar nga Ramses 13 shekuj para Erës Sonë dhe është vepër e punës së përbashkët të një grupi arkeologësh vendas, ndihmuar nga një grup gjerman.

Statuja është e gjatë rreth 8 metra. Përveç shkëputjes së kokës nga pjesa tjetër e veprës së realizuar, ajo është e ruajtur në gjendje të mirë.

Ministri egjiptian i Antikiteteve foli me entuziazëm.

“Të martën më telefonuan dhe më thanë që të jap lajmin e një zbulimi kolos, të zbulimit të një statuje mbreti, ndoshta e Ramses II, e gjitha e punuar nga një gur i rrallë dhe tejet i fortë, që zakonisht gjendet nëpër krateret e vullkaneve”, tha ministri Khaled al-Anani.

Edhe arkeologët besojnë se statuja i takon Ramses II, i njohur edhe si Ramsesi i Madh. Ai ishte faraoni i tretë i dinastisë së 19-të në Egjiptin e lashtë dhe besohet se ka udhëhequr vendin për 66 vite, nga viti 1279 para Erës Sonë deri në vitin 1213 pas saj.

Historianët besojnë se ai është autor i një sërë ekspeditash ushtarake, që çuan në zgjerimin e kufijve të Egjiptit nga Siria e sotme deri në Nubi (Sudani i Jugut). Pasardhësi i tij e quante “Paraardhësi i Madh).