Zyra e Komisionerit për Mbrojtjen e të Dhënave Personale gjobit 17 “Call Center”

Zyra e Komisionerit për të Drejtën e Informimit dhe Mbrojtjen e të Dhënave Personale ka gjobitur 17 subjekte tregtare, me objekt veprimtarie në sektorin “Call Center”, në lidhje me të dhënat personale që përpunojnë, të cilët  më parë iu nënshtruan procedurës së hetimit administrativ.

Gjatë periudhës mars-prill 2015, zyra e Komisionerit ka realizuar hetime administrative në disa kompani të këtij sektori, që janë kontrollues të dhënash personale. Në përfundim të procedurave përkatëse, është verifikuar shkelja e detyrimit ligjor për të njoftuar Zyrën e Komisionerit në lidhje me përpunimin e të dhënave personale.

Kjo iniciativë e ndërrmarrë është rezultat edhe i ankesave të subjekteve të të dhënave të depozituara pranë institucionit tonë. Këto subjekte, kanë detyrimin ligjor për të njoftuar Zyrën e Komisionerit në lidhje me të dhënat personale që përpunojnë. Këto hetime administrative të Zyrës së Komisionerit janë realizuar edhe në zbatim të marrëveshjes së bashkëpunimit me Autoritetin homolog në Republikën e Italisë, dokument i nënshkruar në muajin shkurt të këtij viti.