Universitetet/ 600 kuota studimi për kandidatët shqiptarë nga rajoni
600 do të jenë kuotat që Ministria e Arsimit do t’i akordojë kandidatëve shqiptarë që jetojnë në rajon, për të studiuar në universitetet publike në Shqipëri.
Një ditë pas shpalljes së listës së fituesve në universitetet publike, të kandidatëve shqiptarë që jetojnë në rajon, Ministrja e Arsimit dhe Sportit, Lindita Nikolla në një deklaratë për shtyp ditën e mërkurë, ka shprehur mbështetjen e kësaj ministrie në lidhje me 600 kuotat e studimit, akorduar kandidatëve shqiptarë nga Maqedonia, Mali i Zi, Presheva, Bujanovci dhe Medvegja.
“Kandidatët nga Republika e Kosovës, si dhe kandidatët shqiptarë nga Maqedonia, Mali i Zi, Presheva, Bujanovci dhe Medvegja të cilët rezultojnë fitues të regjistrohen pranë sekretarive mësimore të fakulteteve brenda datës 8 tetor 2014”, u shpreh Ministrja Nikolla.
Kandidatët nga trojet shqiptare përfitojnë kuota për vazhdimin e studimeve në IAL publike, sipas VKM Nr. 517 datë 01.08.2014 “Për kuotat e pranimit në institucionet publike të arsimit të lartë, cikli i parë i studimeve me kohë të plotë, programet e studimeve jo universitare, profesionale dhe në programet e integruara të studimeve të ciklit të dytë, si edhe tarifat e shkollimit për vitin akademik 2014 – 2015”, nënvizohet në njoftimin zyrtar.
