Danimarka pezullon shitjen e armëve për Arabinë Saudite
Danimarka njofton se ka pezulluar shitjen e armëve për Arabinë Saudite, transmeton Anadolu Agency (AA).
Në një deklaratë nga Ministria e Punëve të Jashtme e Danimarkës thuhet se për shkak të krizës njerëzore në Jemen e shkaktuar nga lufta e brendshme dhe vrasjes së gazetarit saudit, Jamal Khashoggi, është pezulluar shitja e armëve për Arabinë Saudite.
“Arabia Saudite po luan haptazi rol negativ në krizën njerëzore në Jemen dhe në vrasjen e Khashoggit. Ka ardhur koha që këtij shteti t’i dërgohet një sinjal i qartë i paralajmërimit”, thuhet në deklaratë.
Ministri danez i Punëve të Jashtme, Anders Samuelsen, është shprehur se shpreson që edhe shtetet e Bashkimit Evropian (BE) të marrin vendim për pezullimin e shitjes së armëve për Arabinë Saudite ashtu siç ka bërë shteti i tij, duke e treguar këtu si shembull Gjermaninë.
Duke kritikuar qëndrimin e SHBA-ve ndaj Arabisë Saudite, ministri Samuelsen deklaroi se SHBA-ja po vepron në drejtim të kundërt të Evropës dhe se po vazhdon të shesë armë për Arabinë Saudite në vlerë prej miliarda dollarësh.