Mediat serbe: Vuçiç do ta presë Ramën

Mediat serbe njoftojnë sot se kryeministri serbe, Aleksander Vuçiç mund ta presë homologun e tij shqiptar, Edi Rama javën e ardhshme në Beograd. Gazeta “Kurir” i referohet burime në qeverinë serbe teksa shkruan se “Edhe pse kryeministri serb nuk ka njoftuar zyrtarisht lidhur me vizitën e Kryeministrit të Shqipërisë, Edi Rama më 22 tetor, Kurir ka mësuar se ndoshta nuk do të refuzojë mikpritjen”.

Kryeministri Aleksandar Vuçiç foli dhe me kancelaren gjermane Angela Merkel dhe deklaroi se Serbia, pavarësisht incidenteve në ndeshjen e futbollit Serbi-Shqipëri, do të bëjë gjithçka për të ruajtur stabilitetin në rajon. Nga ana e tij kryeministri Edi Rama ka folur për CNN dhe ka thënë se është gati të shkojë në Beograd duke shtuar se ndihej i keqardhur që për incidentin folën edhe zyrtarët e lartë politik në Serbi.
Në të njëjtën kohë Rama ka mohuar që vëllai i tij Olsi, i pranishëm së bashku me 45 shqiptarë të tjerë në stadium të ketë dorë në ngritjen e banerit.