Beqaj: Specializime, së shpejti 18 kuota për kardiologji
Në takimin Ndërkombëtar me temë “Sfidat e Reja në Kardiologjinë Intervencionuese, Kardiokirurgji dhe Elektroiziologji”, Ministri i Shëndetësisë Ilir Beqaj theksoi rëndësinë e kërkimit shkencor në mjekësi.
Ky takim u organizua nga Shoqata Shqiptare e Kardiologjisë, Shoqata e Kardiologjisë Invazive Shqiptare në bashkëpunim me Ministrinë e Shëndetësisë ku ishin të pranishëm Ministri i Shëndetësisë, Ilir Beqaj, zv/ministri i Arsimit Arbian Mazniku, Dekani i Fakultetit të Mjekësisë, Ali Rifatllari, Shef i Shërbimeve, Artan Goda.
Ministri Beqaj duke iu referuar burimeve të pakta njerëzore për kirurgë dhe kardiokirugë u shpreh se “së bashku me Ministrinë e Arsimit janë duke punuar për të specializuar njerëz në këtë fushe, specializime që do të hapen këtë vit, ku 18 kuota do të jenë në kardiologji, 12 kuota fikse dhe 6 të lira “. Ndërkaq, Ministri Beqaj u ndal në disa momente kyçe gjatë fjalës së tij.
“Sëmundjet vaskulare dhe tumorale janë përcaktuar qartë në programin e qeverisë si dy grup sëmundjet me të cilat ne do të meremi më shumë, pasi kanë prevalencë më të lartë në ditët e sotme’, tha ai. Më tej Beqaj shtoi se “ në shërbimin e Hemodinamikës në QSUT këtë vit, kryhet një punë 40 % më e madhe si volum pasi kemi mundur të furnizojmë me 40 % me shumë materjale mjeksore”.
“Në korrik qeveria përjashtoi nga tatimi mbi vlerën e shtuar të gjitha pajisjet mjekësore të implatueshme”, u shpreh ministri i Shëndetësisë, Ilir Beqaj.
Zv/ministri i Arsimit, Arbian Mazniku u shpreh se “Shqipëria është pjesë e projektit “Horizon 2020” dhe kjo tregon hapat e rëndësishme që po bëhën në drejtim të rritjes së cilësisë së arsimit dhe ndihmesës në mjekësi, si një ndër fushat më avangardë të shoqërisë”.
