Grafite në rrugë që ju marrin mendtë

Dukuria 

Shumëkush në botën perëndimore e ka vënë re se prej disa kohësh ka nisur një trend i ri i grafiteve, të cilat si terren për të shënjuar veprat e tyre, përdorin tashmë pikërisht rrugët, terrenin me shtrirje horizontale dhe jo atë vertikale

Skena artistike tepër kreative e të ashtuquajturës “street-art” apo e njohur si grafitet, veç dëmeve që po dëgjojmë se ka shkaktuar përgjatë këtyre ditëve në Kosovë (kujtojmë këtu grafitet seksiste ndaj Presidentes së Kosovës, Jahjaga, apo të ndonjë politikani tjetër në vend) ka dhe shumë admirues e ushtrues në mbarë botën.

Artistët e këtij zhanri shfrytëzojnë shpesh hapësira të braktisura, mure shtëpish, stacione metroje dhe ura autostradash, duke përdorur nga ana tjetër edhe çdo objekt tjetër sado të vogël që gjejnë e thyer shpesh rregullat dhe shkaktuar debate.

Shpesh, pikërisht kjo tentativë shihet si synim në vetvete i këtij lloj arti, që padyshim se tipar kryesor ka fantazinë e shfrenuar dhe shpirtin e protestës, pasi ushtrohet kryesisht në rrugë e nga njerëz të përjashtuar prej “normalitetit”.

Kësisoj, shumëkush në botën perëndimore e ka vënë re se prej disa kohësh ka nisur një trend i ri i grafiteve, të cilat si terren për të shënjuar veprat e tyre përdorin tashmë pikërisht rrugët, terrenin me shtrirje horizontale dhe jo atë vertikale.

Akoma më interesante duket kjo tendencë kur sheh se motivet që ata krijojnë, nëse përqendrohesh, të bëjnë ta humbasësh mendjen e të biesh në … gropë, humnerë apo nga ndonjë shpat i thepisur malesh të larta.

Bëhet fjalë për një art tredimensional shpesh me përmasa madhore, ku ngjyrat e shumta dhe kreativiteti, i japin jetë një arti bashkëkohor, i gjithi për t’u (ri)zbuluar. Më poshtë gazeta “Shqip” po ju sjell një përzgjedhje prej më të “rrezikshmeve”.