Garancia e ushqimeve, dyshime që sallamet e skaduara riciklohen sërish
Riskut të helimimit nga konsumi i ushqimeve, përveç temperaturave të larta në këto ditë korriku, u shtohen edhe produktet e mishit, të cilat kompanitë e prodhimit abuzojnë duke i futur aditivë apo konservantë në doza më të larta me qëllim për t’i rritur kohëzgjatjen e tyre në treg.
Të gjithë artikujt mbajnë në etikë datën deri kur mund të konsumohet secili prej tyre dhe për mallin e pashitur, subjektet që i tregtojnë njoftojnë kompaninë e prodhimit për t’i terhequr.
“Tërhiqen vetë nga kompania ku janë marrë dhe nuk e di si procedohet me ta pas këtij momenti. Për artikujt që vijnë nga Italia i asgjësojmë ose nëse janë në sasi të mëdha thërritet institucioni përkatës, AKU dhe ata e dinë si vazhdohet më tej”, thotë Erjeta Lleshi, përgjegjëse supermarketi.
Subjektet që tregtojnë i njoftojnë menjëherë kompanitë prodhuese për t’i larguar produktet që kanë skaduar ose janë në prag skadence, por sa të e ndërgjegjshme janë kompanitë prodhuese për të hequr nga tregu dhe për t’i asgjësuar ato?
Burime të Top Channel thonë se ka kompani i shqiptare të prodhimit të sallameve, të cilat i tërheqin dhe më pas i fusin sërish në makineri duke ripodhuar produktin e duke e hedhur sërish në treg.
