Idhtarët e Berishës në veprim
Ishte një pamje sa për të qeshur aq dhe për të qarë kur së bashku deputetët Bardhi dhe Noka nuk rreshtën së penguari kolegën e opozitës, deputeten Flutura Açka, që të mos fliste. I tërhoqën dhe mikrofonin, i hakrroheshin e deri gati sa nuk e shtynë. Edhe telat e mikrofonit desh ia shkulën…Ajo ruajti gjakftohtësinë . Tregoi dinjitetin e saj. U përpoq të vazhdonte të fliste. Po ku e lanë alabakët e komunistit Berisha që deputetja shkrimtare të shprehej lirshëm?!Nuk ishte se ajo po lavdëronte qeverisjen e Ramës. Përkundrazi. Në komisionin e medias donte të shpaloste alternativat e saj për çështjet që donte të shtjellonte. Bllokimi i fjalës së një deputeteje të opozitës po nga opozitarët e të njëjtës parti është një turp i radhës për Parlamentin tonë. Dy burra kokëngjeshur përbaltën dy tre deputetet e së njëjtës parti?! Ndërhyrja e tyre skandaloze, shumë e turpshme dhe jashtë mase fyese për dinjitetin e atyre deputeteve femra, nuk është rastësi ose lajthitje e çastit e dy burrecave. Jo. Ajo e ka zanafillën nga dita kur u njoftua se Berisha, (NON GRATA i SHBA-së dhe Anglisë), u akuzua nga SPAK-u për korrupsion pasiv, ndërsa dhëndëri i tij u arrestua po për aferën e kompleksit sportiv “Partizani”. Në ato ditë NON GRATA lëshoi kushtrimin për të përmbysur qeverisjen e “banditit” Rama. Do të përdorte të gjitha format e mosbindjes civile (lexo:kryengritjes) deri në fitoren përfundimtare përmes dhunës, jo përmes votës. Se Rama nuk u mundka dot me vota?! Kjo thirrje çjerrëse u përsërit çdo ditë në format nga më të ndryshmet, megjithatë populli nuk e ndoqi ish idhullin e tij. Iu përgjigjën vetëm disa qindra vetë. Ku u strukën gati mbi një milion e gjysmë shqiptarë që dikur brohoritnin ethshëm për Berishën?! Heshtën ,se për të gjithë ata ishte dhe është e qartë që çdo shqiptar ka për detyrë të paraqitet në organet e drejtësisë për të mbrojtur pafajësinë e tij. Kush përpiqet t’i shmanget atij ballafaqimi, kuptohet se ka frikë nga e vërteta. I mbetur si peshku pa ujë ( me që populli nuk iu përgjigj) NON GRATA vendosi të bllokonte punimet e Parlamentit me mendimin se nga flaka, tymi dhe karriget e përmbysura në foltore , populli do të merrte zemër dhe do të bashkohej për të rrëzuar qeverinë e narko-shtetit. Edhe pse po bëhen disa muaj që Berisha dhe Rithemelimi Parlamentin e kanë kthyer në rumpallë, ( vetëm atë di të bëjë ai), populli nuk i është bashkuar. Përkundrazi është i fyer. Nga anketimi i këtyre ditëve ka dalë se mbështetja për të majtët ,që u dashkan rrëzuar me revolucion, del se është shtuar. Po ashtu edhe mbështetësit e Bashës janë rritur. Madje ka një ndryshim shumë të madh midis opozitarëve të RD-së zyrtare, të cilët kërkojnë që Parlamenti të kthehet në normalitet, me grupin e komunisto-bajraktarit Berisha, i cili kërkon me çdo kusht të përflaket Shqipëria për të mbrojtur njeriun që ka menduar dhe mendon se është mbi ligjin. Vjekësin na e paskan gjetur: pse nuk i jepet opozitës kryesimi i komisioneve parlamentare hetuese. Në çdo vend të botës funksionojnë këto lloj komisionesh. Ka edhe komisione të përbashkëta bipartizane, si i quajnë, që shqyrtojnë probleme të rëndësishme nga më të ndryshmet që duhet të shqyrtojnë deputetët apo edhe senatorët. Ato komisione gjithmonë i vijnë në ndihmë parlamenteve për të përmirësuar ligjet në këtë ose atë sektor problematik. Ama ato komisione kurrë nuk janë struktura paralele me Prokuroritë dhe Gjykatat. Janë komisione që ndihmojnë Parlamentet vetëm për të hartuar ligje më efikase për një qeverisje sa më të mirë. Ato nuk janë për të ngritur akuza. Parlamenti është organ ligjbërës. Kjo është detyra e tij. Për zbatimin e ligjeve përgjigjet vetëm drejtësia përmes prokurorive dhe gjykatave që janë krejtësisht të pavarura. Asnjeri nuk e pengon këtë ose atë deputet apo shtetas të bëjë kallzime në prokurori. Pikërisht nga këto kallzime SPAK-u ka një serë dosjesh, midis të cilave edhe atë të Inceneratorëve ose edhe ajo për privatizimin e kompleksit ” Partizani”…Të mos harrojmë se për inceneratorët ishte opozita ajo që vuri në lëvizje SPAK-un!
