Dënohen me burg përdhunuesit e Semanit
Gjykata e Fierit shpalli vendimin duke dënuar me burg Endri Gogën dhe Shaban Skejën, dy autorët që grabitën dhe përdhunuan një çift në zonën e Semanit, vjeshtën e 2014.
Gjatë procesit gjyqësor dy të akuzuarit kanë pranuar akuzën e Prokurorisë dhe në proces u zbardh se Endri Goga, 27 vjeç, ka qenë ideatori dhe organizatori i gjithë ngjarjes, ndërsa Shaban Skeja, 20 vjeç, bashkëpunëtor i tij.
Për këtë, gjykata ka vendosur dënimin me 24 vite burgim për Endri Gogën dhe 9 vite për Shaban Skejën, por që të dy do të vuajnë një të tretën më pak se vendimi i shpallur për shkak të gjykimit të shkurtuar.
Këta dy persona, që punonin si barinj në zonë, grabitën dhe përdhunuan një çift të fejuarish më 20 tetor të 2014 në pyllin e Semanit në Fier. Në momentin e arrestimit dy autorëve të dyshuar, iu gjetën maskat dhe armët që kishin përdorur për kanosjen dhe përdhunimin e çiftit të të fejuarve.
Këta të fundit kishin dalë për një shëtitje në pyllin e Semanit dhe në një moment janë sulmuar nga dy autorët e dyshuar, duke i grabitur dhe përdhunuar.
