“Pagesa e fundit”, shkatërrohet rrjeti i prostitucionit
Policia e Durrësit ka goditur një rrjet të prostitucionit duke nisur hetimet për 12 persona të përfshirë.
Sipas burimeve zyrtare, në sajë të operacionit të koduar “Pagesa e Fundit”, katër persona janë arrestuar, një taksist është ndaluar dhe 7 të tjerë do të hetohen në gjendje të lirë.
Të arrestuar janë Fillor Muçellari 66 vjeç, Fatjona Gjoka 28 vjeçe, Alma Hoxha, 41 vjeçe dhe Lutfije Çota 47 vjeçe. I ndaluar është taksisti Liko Torra, 60 vjeç.
Ndërsa shtatë shtetas të tjerë do të hetohen në gjendje të lirë.
Të arrestuarit në rolin e ndërmjetësve gjenin klientët, të cilët më pas nëpërmjet dy taksistëve, Liko Torra dhe Sh.K. ua dërgonin në hotele të ndryshme të qytetit të Durrësit, në vendin e quajtur “Shkëmbi i Kavajës” si edhe në banesat private të personave të mësipërm, kundrejt pagesës 50-100 euro.
Në cilësinë e provave materiale janë sekuestruar 3 automjete, kartmonedha, aparate celulare dhe sende që i përkasin veprës penale. Ndërkohë operacioni vijon për kapjen e personave të tjerë të përfshirë në këtë aktivitet kriminal.
Për Fillor Muçellarin rëndon akuza e shfrytëzimit të prostitucionit dhe mbajtjes së lokaleve për prostitucion. Alma Hoxha akuzohet për prostitucion dhe shfrytëzim prostitucioni, për dy taksistët moskallëzim krimi dhe për të tjerët rëndon akuza e prostitucionit.
