Ndryshimet në ligjin “Për shërbimin përmbarimor”, Manjani: Reduktim të nivelit të kredive me probleme
Komisioni Parlamentar i Ekonomisë dhe Financave shqyrtoi të hënën ndryshimet e propozuara nga qeveria në ligjin “Për organizimin dhe funksionimin e shërbimit të përmbarimit gjyqësor”.
Ministri i Drejtësisë, Ylli Manjani i pranishëm në komision tha se ndryshimet janë pjesë e një plani masahs që kanë si synim reduktimin e nivelit të kredive me probleme në sistemin bankar, duke evidentuar masat konkrete me propozime për ndryshime konkrete, si dhe duke përcaktuar institucionin përgjegjës për secilën masë.
Ky plan masash është bashkëfirmosur nga Kryeministri dhe Guvernatori i Bankës së Shqipërisë.
Në Shqipëri, problemet e ekzekutimit dhe të mbledhjes së detyrimeve janë disa nga faktorët kryesorë që qëndrojnë pas një shkalle shumë të lartë të kredive me probleme në një nivel prej mbi 20%. Përmbarimi është një element i rëndësishëm i përmirësimit të mbledhjes së detyrimeve bankare dhe, në këtë mënyrë, i përmirësimit të të gjithë sistemit financiar.
Shqipëria kishte një sistem të vetëm të përmbaruesve publikë deri në vitin 2008, kur vendi krijoi shërbimin privat përmbarimor. Pas futjes së sistemit të përmbaruesve privatë, disa përfaqësues kyç të sektorit privat dhe publik perceptuan një përmirësim të mbledhjes së detyrimeve.
