Gjykata rrëzon shoqërinë civile, vendos pro ndërtimit të këndit të lojërave te Liqeni
Rrëzohet kërkesa e shoqërisë civile për pezullimin e punimeve për ndërtimin e këndit të lojërave te Parku i Liqenit. Gjykata Administrative vendosi sot që të lejojë vazhdimin e punimeve të Bashkisë së Tiranës për ndërtimin e këndit të lojërave te Liqeni, duke i dhënë fund edhe debatit mbi ligjshmërinë e punimeve aty. Por, mbi të gjitha fëmijët e Tiranës do ta kenë gati këndin e tyre në 1 qershor, siç edhe ka premtuar kryebashkiaku i Tiranës.
Kërkesa e shoqërisë civile, e cila në këtë çështje përfaqësohej dhe mbrohej nga Altin Goxhaj dhe studioja e tij avokatore, pretendonte që Gjykata Administrative të pezullonte punimet për këndin e lojërave për fëmijë. Por, vendimi për rrëzimin e kërkesës nga ana e gjykatës vërtetoi edhe një herë ligjshmërinë e punimeve nga ana Bashkisë së Tiranës, por edhe ekzistencën e lejes për zhvillimin e projektit sipas vendimit të Këshillit Kombëtar të Territorit.
Me sa duket, as politizimi i çështjes nga opozita dhe protestat e saj të dhunshme kundër këndit të fëmijëve, por as presionet e Presidentit Bujar Nishani, i cili u përfshi së fundi krejt pa vend në punët e pushtetit vendor, nuk kanë dhënë fryte për Partinë Demokratike, e cila e ka kthyer prishjen e këndit të lojërave në kalin e saj të betejës politike.
