Braçe: Prokuroria të hetojë grumbullimin e kartmonedhave të dëmtuara
Komisioni për Ekonominë dhe Financat shqyrtoi të hënën raportin e Kontrollit të Lartë të Shtetit për Bankën e Shqipërisë.
Mbledhja e Komisioni ku ishin të pranishëm edhe Kryetari i KLSH-së Bujar Leskaj dhe Guvernatori i Bankës së Shqipërisë, Gent Sejko, u zhvillua me dyer të mbyllura.
Në një deklaratë për mediat pas mbledhjes, kryetari i Komisionit, Erion Braçe sqaroi se ka një pretendim nga KLSH për një dëm ekonomik të shkaktuar nga Banka e Shqipërisë për periudhën janar 2010-korrik 2014 nga grumbullimi i kartmonedhave të dëmtuara.
“Nga ajo që u tha sot në komisionin e Ekonomisë, nuk bëhet fjalë për vjedhje. Ka një pretendim nga KLSH që gjatë periudhës janar 2010-korrik 2014 për një dëm eknomik të shkaktuar dhe që vjen nga mospërputhja e e ligjit për BSH-në me rregulloret e vitit 98 dhe shtatorit 2013”, deklaroi Braçe për mediat.
Kreu i Komisionit Parlamentar, Braçe u shpreh se kjo është një çështje për të cilën institucionet e KLSH dhe Komisionit të Ekonomisë nxisin Prokurorinë që të çojnë deri në fund hetimin.
Braçe tha se raporti i Kontrollit të Lartë të Shtetit për vjedhjen në BSH, është i klasifikuar si sekret shtetëror dhe bankar dhe se ligji e detyron çdo institucion të ruajë sekretin shtetëror.
Prokuroria e Tiranës ka nisur në fillim të këtij muaji hetimet për dëmin ekonomik të shkaktuar me kartmonedhat e dëmtuara gjatë viteve 2010-2014, të denoncuar në një raport sekret nga Kontrolli i Lartë i Shtetit. Hetimi ka nisur pas një kallëzimi të vetë KLSH-së.
Pretendohet se bankat private kanë grumbulluar kartmonedhat e dëmtuara nga qytetarët me një çmim më të ulët sesa vlera e tyre nominale. Por kur i kanë dorëzuar në Bankën e Shqipërisë, kjo e fundit i ka paguar vlerën e plotë. Diferenca sipas burimeve nga KLSH, ka shkuar si fitim i paligjshëm për bankat private.
