Dibër, banorët e zonës nuk e duan Skavicën
Banorët e fshatrave që preken nga projekti i hidrocentralit të Skavicës, në Katund të Ri, protestuan këtë të hënë pikërisht në vendin ku mendohet të ndërtohet diga.
“Populli i Dibrës priste ndërtimin e Rrugës së Arbërit, kur papritur del Skavica. Një hidrocentral ogurzi i mbajtur mbi kokën e dibranëve për 40 e ca vjet”, tha një prej tyre.
Banorët u shprehën të shqetësuar për tokat e tyre, pemtarinë, por edhe pasuritë kulturore të zonës. Aty, thanë ata, ka vendbanime ilire, kisha të vjetra, kulla dhe xhami të shumë shekujve më parë.
Aty ndodhen edhe varret e të parëve, por më shqetësuese për banorët është shpërngulja e madhe e popullësisë nga zona që do përmbytet nga liqenet.
“Të japësh me konçesion një vepër apo t’i shesësh një copë tokë një shteti të huaj pa dijeninë e pronarëve dhe Parlamentit është shkelje e rëndë e Kushtetutës”, deklaroi Nazmi Drizi, kryetar i Shoqatës së Luginës së Drinit të Zi.
Në mbështetje të banorëve të zonës ishin edhe deputetë të opozitës.
