“Fratello, tigër, o i madh…”, zbërthehet “BlackBerry”, 138 biseda në tre muaj mes Ahmetajt dhe Mërtirit
Dalin detaje të tjera rreth dosjes hetimore të SPAK për Arben Ahmetajn, të cilin e akuzon për 3 vepra penale dhe kërkon nga Kuvendi autorizim për arrestimin e tij. Sipas TV Klan, në dosjen voluminoze tregohen lidhjet e hershme të Ahmetajt me Klodian Zoton e Mirel Mërtirin. Miqësia e tyre daton që në vitin 2012, para se Ahmetaj të bëhej ministër.
Gjithnjë duke iu referuar të dhënave nga dosja e SPAK, thuhet se janë me qindra biseda të zbuluara në një telefon që SPAK gjeti në shtëpinë e bashkëjetueses së Ahmetajt gjatë kontrollit të ushtruar disa kohë më parë në Hamallaj.
Telefoni BlackBerry, sipas SPAK, përdorej nga Ahmetaj dhe bisedat e fshira u rikuperuan nga ekspertët e IT-së. Për SPAK, bisedat tregojnë marrëdhënien miqësore të ish-ministrit me Mërtirin e Zoton.
Kjo vërtetohet edhe nga mënyra si i drejtoheshin njëri-tjetrit, me fjalë si “fratello”, “tigër”, “i madh”.
