PDIU fiton në bashkitë e Peqinit, Konispolit dhe Rrogozhinës
PDIU bën me dije se kandidatët e saj të zgjedhur bashkërisht me partnerët e tjerë të Aleancës për Shqipërinë Europiane për bashkitë e Peqinit, Konispolit dhe Rrogozhinës rezultojnë fitues.
“Ky rezultat i mrekullueshëm në garën për udhëheqjen e bashkive të reja sipas reformës administrative, në të cilën ne ishim pjesëmarrës vendimtarë, na tregon disa përfundime. Cilësia e kandidatëve, mosha e re, formimi i tyre profesional, dhuntitë morale, programi ynë i veçantë për bashkitë, mesazhet e pajtimit mbi ndarjet e gjitha llojeve, ishin përcaktues në këtë sukses të ri elektoral të PDIU-së, që konfirmohet si njëra ndër partitë kryesore në vend”, thuhet në një njoftim për shtyp të PDIU-së.
PDIU përgënjeshtroi gjithë “kasandrat” brenda dhe jashtë vendit, me rezultatin e arritur. “Ajo u konfirmua si partia e bashkimit të shqiptarëve mes vetes, pavarësisht fesë së tyre, të shqiptarëve me pakicat etnike, etj, dhe kjo ishte përgjigja më e mirë për gjithë ata që donin ta asocionin partinë tonë me parti imagjinare naziste apo fashiste të së shkuarës”, vijon njoftimi për shtyp i PDIU-së.
Sipas PDIU-së, trendi i votave në Këshillat Bashkiakë tregon po ashtu një rritje të konsiderueshme.
“Për t’u veçuar është rezultati i lartë i Peqinit nga kandidati ynë i përbashkët brenda ASHE-së, Saimir Hasalla. Me këtë rezultat PDIU konfirmoi se ajo di të bashkojë shqiptarët pavarësisht përkatësisë së tyre partiake, rreth një kandidati të shkëlqyer dhe një oferte elektorale cilësore”, përfundon PDIU.
