E mori rrjedhja e ujit në kanionet e Osumit, gjendet pas tre ditësh trupi i pajetë i 68-vjeçarit holandez
Prej 3-ditësh i mbytur në kanionet e Osumit në Skrapar, është gjetur sot trupi i pajetë i turistit hollandez, 68-vjeçarit Jules Schuurmans. Trupi i pajetë u gjet nga polombarët e forcave RENA-s dhe pitet të transportohet drejt morgut të Institutit të Mjekësisë Ligjore në Tiranë.
Jules Schuurmans, e mori rrjedha e lumit mbrëmjen e 8 Majit në rrjedhën e kanioneve të lumit Osum.
Njoftimi i policisë:
Kërkimet e pandërprera nga palombarët e RENEA-s, të ndihmuar nga shërbimet e Komisariatit të Policisë Skrapar, bëjnë të mundur gjetjen e trupit të pajetë të shtetasit holandez, i cili u mbyt në ujë, teksa notonte në kanionet e lumit Osum.
Më datë 08.05.2023, shkoi në spitalin e Çorovodës, për ndihmë mjekësore, shtetasja holandeze H. (V. A.) C. S., 64 vjeçe, e cila deklaroi se së bashku me bashkëshortin e saj, shtetasin J. A. S., 68 vjeç, ishin futur për të notuar në kanionet e lumit Osum. 64-vjeçarja kishte mundur të dalë nga uji, ndërsa shprehej se bashkëshortin e saj e kishte marrë rrjedha e ujit.
Menjëherë pas njoftimit, është organizuar puna nga shërbimet e Komisariatit të Policisë Skrapar dhe palombarët e Repartit Special “RENEA”, me qëllim gjetjen e shtetasit J. A. S.
Pas 3 ditësh kërkime të pandërprera në rrjedhën e lumit Osum, ekipi i specializuar i palombarëve të RENEA-s kanë bërë të mundur gjetjen e trupit të pajetë të 68-vjeçarit, në njërin nga kanionet e këtij lumi.
Në kërkime u angazhuan edhe 2 pjesëtarë të federatës “Albania Rafting Group”.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat, për dokumentimin e plotë ligjor të kësaj ngjarjeje.
Ngjarja:
Jules Schuurmans së bashku me bashkëshorten e tij Helma Schuurmans, kishin shkuar për të notuar pasditen e 8 Majit në kanionet e lumit Osum në Skrapar,por i ka marrë rrjedha e lumit. 64-vjeçarja Helma Schuurmans ka mundur të dalë nga lumi, ndërsa bashkëshortin e saj e ka marrë rrjedha e ujit dhe nuk ka mundur dot të dalë jashtë.
Pasi ka dalë nga uji,64-vjeçarja Helam Schuurmans ka shkuar në Spitalin e Skraparit,ku edhe ka marrë ndihmën e parë mjekësore dhe ndodhet jashtë rrezikut për jetën. Pasi është përmendur, turistja holandeze ka kërkuar ndihmën e policisë për gjetjen e bashkëshortit të saj. Çifti i bashkëshortëve Jules dhe Helma Schuurmans,4-ditë para ngjarjes së rëndë kishin shkuar me pushime në Skrapar dhe po qëndronin në një Kamper.
