Të paktën 76 migrantë të vdekur nga mbytja e një anieje

Të paktën 76 kufoma janë gjendur dhe 198 persona u shpëtuan në brigjet e Libisë pas mbytjes dje të një anieje që transportonte rreth 300 migrantë, njoftoi një zëdhënës i Gjysmëhënës së Kuqe sipas një bilanci të ri.

“Deri tani, 76 kufoma janë gjendur dhe 198 persona janë shpëtuar”, deklaroi zëdhënësi i Gjysmëhënës së Kuqe, Mohammed al-Masrati.

“Vazhdon të ketë të zhdukur, me dhjetëra, por ne nuk e dimë se cili ishte numri i tyre ekzakt”, shtoi ai.

Një përgjegjës i rojes bregdetare libiane kishte njoftuar dje në mbrëmje se kishte të paktën 30 të vdekur dhe dhjetëra të zhdukur nga kjo mbytje në brigjet e qytetit të Zouaras, që ndodhet rreth 160 kilometra në perëndim të qytetit libian Tripoli.