ARRSH: Rreshjet e dendura të shiut sjellin vështirësi për kalimin e automjeteve

Rreshjet e dendura të shiut përgjatë dy ditëve kanë sjellë vështirësi në qarkulimin e mjeteve. Autoriteti Rrugor Shqiptar rekomandon të gjithë drejtuesit e mjeteve që të respektojnë rregullat e qarkullimit rrugor.

Bëhet me dije se deri në orën 09:00 situata e kalueshmërisë së akseve rrugore paraqitet si më poshtë:

Tiranë

Qarkullimi kryhet normalisht në të gjitha akset e këtij qarku. Qarkullimi kryhet pa zinxhirë.

Durrës

Nuk ka probleme në akset e këtij qarku. Të bëhet kujdes në qarkullim, pasi ka trafik prej rreshjeve të dendura.

Elbasan
Aksi Librazhd-Steblevë është i hapur. Ka rënie gurësh të herëpashershme gjatë gjithë aksit Qafë Thanë – Murrash, por pastrohet vazhdimisht. Qarkullimi është normal në aksin Elbasan-Librazhd-Qafë Thanë. Ka patur rënie gurësh gjatë natës në aksin Elbasan – Peqin, por aktualisht është e pastruar. Rënie dherash në rrugë ka patur edhe në segmentin Banjë -Drizë dhe po punohet për pastrimin e tyre. Rekomandohet përdorimi i zinxhirëve në segmentin Fushë Stude–Steblevë. Qarkullimi bëhet me vështirësi në Shelcan, pjesë e aksit Elbasan-Gjinar, ku ka ndodhur rrëshqitja e rrugës. Të bëhet kujdes nga ana e mjeteve sidomos kur kalojnë në segmente ku ka rrëshqitje të rrugës.

Berat
Nuk ka probleme për qarkullimin e mjeteve në akset e këtij qarku. Të bëhet kujdes në segmentet rrugore ku punohet dhe kujdes me shpejtësinë. Rekomandohet të qarkullohet me kujdes, për shkak të ngricave nga temperaturat e ulëta të natës dhe orëve të para të mëngjesit.
Vlorë
Nuk ka probleme për qarkullimin në të gjitha akset e këtij qarku. Qarkullimi kryhet normalisht në të gjitha akset.

Gjirokastër
Nuk ka probleme për qarkullimin në të gjitha akset e këtij qarku. Rekomandohet ecja e kujdesshme, sepse nga shirat mund të ketë rënie dherash e gurësh në rrugë.

Korçë
Ka rreshje të dendura shiu. Gatishmëria është e plotë. Kalueshmëria kryhet pa probleme. Qarkullimi kryhet pjesërisht me zinxhirë vetëm në aksin Korçë – Dardhë. Në të gjithë akset e tjera qarkullimi kryhet normalisht. Të bëhet kujdes nga mjetet duke respektuar shpjetësine, sepse si rezultat i shirave mund të ketë rënie gurësh e dherash, të cilat sjellin vështirësi në qarkullim.

Kukës
Ka rreshje të vazhdueshme shiu në të gjithë qarkun. Kjo ka sjellë që në shumë akse të ketë rënie dherash dhe gurë në rrugë. Është punuar gjatë natës dhe mëngjesit të hershëm për pastrimin e tyre dhe tani qarkullimi kryhet normalisht. Qarkullimi kryhet pa zinxhirë në të gjitha akset e këtij qarku.

Dibër
Si rezultat i shirave, në disa akse ka patur rënie dherash në rrugë. Janë marre masa për pastrimin e akseve. Në të gjithë qarkun qarkullohet normalisht dhe pa zinxhirë.

Shkodër
Në te gjithë qarkun ka rreshje të vazhdueshme shiu, dhe si rezultat në disa akse të Pukës ka patur rënie dherash dhe gurësh në rrugë. Janë marrë masat për pastrimin. Qarkullimi kryhet normalisht në të gjitha akset e këtij qarku. Qarkullimi kryhet pa zinxhirë në të gjitha akset e këtij qarku.

Fier
Nuk ka probleme për qarkullimin. Të bëhet kujdes në levizje, për shkak të fluksit të madh të makinave në superstradën Fier – Lushnjë, dhe të respektohet sinjalistika rrugore.

Lezhë
Ka rreshje shiu të vazhdueshme. Nuk ka probleme për qarkullimin në të gjitha akset e këtij qarku dhe lëvizja bëhet pa zinxhirë.