Lëndë eksplozive në automjet, alarm pranë shkollës “Niket Dardani”

Një pako e dyshimtë në një automjet të parkuar në afërsi të Xhamllikut ka ngritur në këmbë policinë e Tiranës. Pas verifikimeve rezultoi që ishte lëndë eksplozive, dhe forcat xheniere kanë bërë të mundur çaktivizimin e saj.

Të dhënat e para bëjnë të ditur se rreth orës 14.10 në rrugën “Sitki Çiço”, në afërsi të shkollës “Niket Dardani”, pronari i një mjeti ka konstatuar të thyer xhamin e shoferit. Kur ka kontrolluar në brendësi ka gjetur poshtë sediljes së pasagjerit një pako të dyshimtë.

Ai ka njoftuar menjëherë policinë. Në vendngjarje është vendosur perimetri i sigurisë, teksa kanë mbërritur dhe forcat xheniere që bënë verifikimin e pakos. Tashmë vijojnë hetimet për zbardhjen e plotë të ngjarjes.