Çregjistrohen 29 përmbarues privatë, Manjani: Status “joaktiv” për më shumë se 1 vit

Ministri i Drejtësisë, Ylli Manjani ka urdhëruar heqjen e 29 certifikatave të përmbaruesve gjyqësor privat dhe çregjistrimin e tyre nga regjistri i përmbaruesve gjyqësorë privat.

Në mbështetje të ligjit “Për shërbimin përmbarimor gjyqësor privat”, i ndryshuar, Ministria e Drejtësisë ka për detyrë kontrollin e zbatimit të ligjit lidhur me veprimtarinë e përmbaruesve gjyqësorë privatë.

Nga verifikimi i Regjistrit të Përmbaruesve Privatë, rezulton se 29 përmbarues të certifikuar nuk janë të regjistruar në regjistrin e përmbaruesve gjyqësorë privatë me statusin “Aktiv”, që do të thotë se nuk e kanë ushtruar funksionin publik të përmbaruesit privat për më shumë se një vit.

Për këto arsye në mbështetje të ligjit “Për shërbimin përmbarimor gjyqësor privat”, i ndryshuar, Ministri Manjani ka urdhëruar çregjistrimin e tyre nga regjistri i përmbaruesve gjyqësorë privat.