Deputetët e PD dhunojnë 3 police, përfundojnë në spital

Protesta e Partisë Demokratike kundër këndit të lojërave të fëmijëve te parku i Liqenit ka degjeneruar në dhunë të ashpër fizike ndaj forcave të policisë bashkiake dhe asaj të rendit.

Deputetët dhe protestuesit demokratë të ardhur nga Kamza dhe Bathorja nuk kanë kursyer as policet femra të bashkisë, 3 prej të cilave si pasojë e goditjeve të marra kanë përfunduar në spitalin e traumës në Spitalin Ushtarak.

Në spital kane përfunduar policet me inicialet D.K, 24 vjeçe, S.A, 25 vjeçe dhe L.S 24 vjeçe. Pas ekzaminimeve të para të mjekëve është konstatuar se efektivja D.K ka pësuar dëmtime të rënda fizike, duke nxjerrë krahun.

Gjithashtu edhe efektivja tjetër L.S ka dëmtuar rëndë klavikulën që lidh në pjesën e sipërme të krahut me qafën. Kjo ka bërë të nevojshme që ato t’i nënshtrohen trajtimit mjekësor intensiv.

Po ashtu edhe policja e bashkiake me inicialet  S.A ka marrë goditje në kokë, duke i shkaktuar hematoma që kanë kërkuar gjithashtu trajtim mjekësor nga stafi i spitalit ushtarak.