Shqipëria, barazim “i hidhur” me Danimarkën. 1-1 në “Elbasan Arena”
Në stadiumin e ri të kombëtares në “Elbasan Arena”, Shqipëria ka barazuar me Danimarkën 1-1. Në një ndeshje emocionuese, ku impianti i ri nuk kishte asnjë vend bosh, kuqezinjtë kanë shënuar të parët me anë të Ermir Lenjanit në minutën e 38-të.
Në pjesën e dytë Danimarka ka shtuar presionin, duke e vënë në vështirësi skuadrën e De Biazit. Lodhja e Canës me shokë ishte e dukshme në fushë dhe në minutën e 81-të, një pasiguri e mbrojtjes sonë ka sjellë golin e barazimit për miqtë.
Një veprim i bukur i Niklas Bendtner në zonë, ku shmang dy kundërshtarë, nxjerr të lirë Lase Viben, i cili barazon rezultatin.
Danimarka kishte mundësi në fund të dyfishonte rezultatin, por portieri Berisha ka bërë mrekullinë, duke shmangur humbjen. Shqipëria tashmë është në krye të grupit I me 4 pikë së bashku me Danimarkën dhe të martën do të luajë sfidën e radhës në Beograd kundër Serbisë.
