Rama: Dibër, faleminderit!
Partia Socialiste u është rikthyer takimeve me mbështetësit e saj në Dibër, por këtë herë jo për t’u kërkuar votën, por për t’i falenderuar ata për mbështetjen e dhënë ditën e dielë.
Takimi i organizuar në Peshkopi kishte për qëllim mirënjohjen dhe falenderimin për votuesit dibranë për mbështetjen e kandidatit të majtë në zgjedhjet e ditës së dielë, ku Muharem Rama u shpall fitues ndaj Sherefedin Shehut me mbi 4 mijë vota diferencë.
Fjalën e tij, Kryeministri Edi Rama e nisi duke kritikuar qëndrimin e opozitës pas shpalljes së rezultatit.
“Si ka mundësi që një parti t’i kthehet dhe të akuzojë një popull të tërë si bagëti që dalin nga parcela e hashashit dhe jo njerëz dhe shqiptarë që morën një vendim? Si ka mundësi që partia më e madhe e opozitës të arrijë deri në këtë pikë pasi e shpall me të madhe një test kombëtar një fushatë vendore, pasi premton që nga këtu do të fillojë një përmbysje e madhe në shqipëri, edhe pasi madje shpall fitoren në momentin kur mbyllen kutitë e votimit?! Pasi sheh që nga numërimi merr vetëm ‘opingën e Sheros’, u turret dibranëve për t’i akuzuar si bashkëpunëtorë në krim. Është fyer i gjithë komuniteti juaj dhe tradita juaj e çmuar”, deklaroi Rama.
Nga ana e tij, kryebashkiaku i sapozgjedhur, Muharem Rama tha se fitorja e thellë i shton më shumë përgjegjësi.
“Rezultati më shton përgjegjësitë dhe më shtyn edhe më fort që ta bëjmë Dibrën ashtu siç e meriton. Gjatë fushatës më kanë thënë trafikant e gjëra të tila, unë vetëm kam shëruar dibranët, plagët e Dibrës”, deklaroi ai.
Në takim marrin pjesë deputetë dhe drejtues të tjerë të Partisë Socialiste që u angazhuan në fushatën për zgjedhje vendore për këtë bashki.
