Gazetarja Tota: U pushova nga puna pasi kërkova të zbuloj historinë e vdekjes dramatike
Gazetarja Alida Tota ka përgëzuar kolegët e emisionit “Publicus” të cilët e publikuan investigimin e tyre online, pas censurimit që ju bë në televizionin Vizion Plus.
Ajo thotë se historia e vdekjes së 17-vjeçarit Ardit Gjoklaj i cili humbi jetën në landfillin e Sharrës, ishte arsyeja që ajo u pushua nga puna në televizionin ku punoi vetëm për pak kohë, A1 News.
“Ky është raporti investigativ, “Kodrina e vdekjes”, që u përgatit nga ekipi “Públicus”, e që nuk u lejua të transmetohej të dielën e shkuar nga administratorët e “Vizion Plus”!
Koleget kurajoze te “Publicus” vendosën ta publikojne online:
” Ky film është historia e një vdekje dramatike që u tentua të mbulohej e më pas të shpërfillej!
Ky film është historia e një kontrate favorizuese që u mbajt e fshehtë!
Ky film është historia e Alida Totës që u pengua, u çensurua e më në fund u pushua sepse kërkoi t’i zbulonte!
Ky film është kundër censurës.
Ky film reflekton përpjekjen dhe kurajon tonë për të thënë të vërtetën”, shkruan ajo në rrjetin social Facebook.
