Rinas/ Mjeti bie në kanal për të shmangur autobuzin, nuk ka të lënduar

Një aksident automobilistik është regjistruar ditën e hënë në afërsi të Rinasit, ku një automjet ka përfunduar në kanal, ndërsa rrezikonte të përplasej edhe me një autobuz.

Burime policore bëjnë të ditur se fatmirësisht nga aksidenti nuk ka pasur të lënduar, por vetëm dëme materiale dhe panik tek pasagjerët e autobuzit. Ngjarja ka ndodhur në segmentin rrugor që lidh autostradën Tiranë-Durrës me Aeroportin e Rinasit, kur mjeti tip “Fiat” ka bërë një parakalim të gabuar, duke përfunduar në kanal.

Mjeti i aksidentuar, sipas Policisë ka qenë duke lëvizur në drejtim të autostradës, teksa ka tentuar të parakalojë një veturë përpara tij. Parakalimi ka qenë jo i menduar mirë dhe për pasojë drejtuesi i mjetit është gjendur përballë një autobuzi, që transportonte punonjësit e një fabrike çimento.

Sipas policisë, drejtuesi i mjetit, emri i të cilit nuk bëhet i ditur në përpjekje për të mënjanuar përplasjen me autobuzin ka devijuar makinën në drejtim të kanalit, duke u rrokullisur dhe duke rënë në të.

Mjeti tip “Fiat”, sipas Policisë, është shkatërruar, por fatmirësht drejtuesi i mjetit nuk ka pësuar ndonjë lëndim. Ai është transportuar në spital për kontrolle sigurie, por pa asnjë problem shëndetësor. Policia ka kryer veprimet procedurale në vendin e ngjarjes, duke bllokuar dhe lejen e drejtimit të drejtuesit të mjetit