Rama: Forumi Ndërkombëtar i Turizmit, muajin e ardhshëm në Tiranë
Kryeministri Edi Rama vizitoi dje stendën shqiptare në Panairin e Turizmit në Berlin.
“Shqipëria në ITB Berlin, Panairi më i madh i Turizmit në botë, ku më në fund përfaqësohemi denjësisht jo thjesht me natyrën e bukur po me një ofertë serioze turistike, falë punës këmbëngulëse vit pas viti, ndryshimit të imazhit të zymtë të Shqipërisë së deri disa viteve më parë, investimeve publike e private, si edhe një armate dinamike operatorësh turistikë”, u shpreh Rama.
Rama informoi se, në muajin prill do të mbahet në Tiranë edhe Forumi Ndërkombëtar i Turizmit.
“Pason në prill Forumi Ndërkombëtar i Turizmit në Tiranë, një bashkëpunim i Ministrisë së Turizmit e Mjedisit me Organizatën Botërore të Turizmit, për të cilin biseduam në Berlin edhe me Sekretarin e Përgjithshëm të UNWTO, Zurab Pololikashvili”, u shpreh Rama.
Operatorët në fushën e turizmit e informuan kryeministrin Rama se, vetëm në ditën e parë të panairit kanë shitur 83 % të kapaciteteve të tyre. Sipas tyre ka pasur interes të lartë, ndërsa prenotimet nisin nga maji e deri në shtator.
