Të moshuarit e familjes Dhespo dhurojnë gjak, Beqaj: Përulem para aktit më të lartë njerëzor
Thanas Dhespo, 88 vjeç dhe bashkëshortja e tij Virgjinica Dhespo, 70 vjeç, kanë dhuruar gjak për fëmijët e sëmurë nga leuçemia, pranë repartit pediatrik të spitalit në qarkun e Gjirokastrës.
Ministri i Shëndetësisë, Ilir Beqaj, nëpërmjet një postimi në rrjetin social “Facebook”, ka shprehur respektin dhe përuljen e tij për familjen Dhespo.
Në një letër drejtuar ministrit të Shëndetësisë, Thanas Dhespo shkruan “Jam një i përndjekur politik i mirëfillte. Sapo mora këstin e dëmshpërblimit, pasi plotësuam nevojat familjare immediate, të cilat janë të shumta në familjen tonë, vendosëm me gjithë zemër të shlyenim një premtim që unë e kam dhënë para një viti, kur kam qënë i ftuar në emisioni televiziv “Jo vetëm kafe” në RTSH, për të ndihmuar sado pak fëmijët në nevojë përpara se të vdes”, thekson në letër, Thanas Dhespo.
Nga ana e tij, ministri Beqaj e ka konsideruar dhe vleresuar aktin më të lartë njerëzor, dhurimin e gjakut nga të moshuarit.
