Dita e Ujit të Bekuar, Peleshi: Mbi lumin Osum do ndërtohet një ishull
Zëvendëskryeministri Niko Peleshi dhe ministri i Drejtësisë, Nasip Naço kanë qenë të pranishëm sot në ceremoninë e hedhjes së kryqit në ujërat e lumit Osum, me rastin e ditës së Ujit të Bekuar.
Për vite me radhë kryqi ishte kapur nga besimtarë myslimanë, ndërsa sot ai u kap nga nje besimat i krishterë.
Në këtë ceremoni, Peleshi vlerësoi harmoninë fetare, me të cilën, siç tha ai krenohemi sot.
Ndërsa më tej numri dy i qeverisë e ndali vëmendjen tek disa projekte të parashikuara për Beratin, ku veçoi ndërtimin e një ishulli mbi lumin Osum.
“Po realizojmë me sukses disa projekte në Berat. Ka përfunduar rikonstruksioni i Urës së Goricës, e cila do inaugurohet së shpejti”.
Ndërsa në lidhje me ndërtimin e ishullit në lumin Osum, Peleshi tha se do të ketë një sipërfaqe prej 4 hektarësh.
“Ndërtimi i ishullit, në funksion të urbanizimit. Projekti do të bëhet me konkurs ndërkombëtar”, tha ai më tej.
CEREMONIA NË ELBASAN
Ceremonia e hedhjes së kryqit në ujë është zhvilluar edhe në qytetin e Elbasanit, në një kompleks pishinash. Mësohet se 4 të rinj janë hedhur për të kapur kryqin në ujë, ndërsa fitimtar ka dalë Armand Oga 26-vjeç.
