Arrestohet ish-juristi i Hipotekës Durrës dhe dy persona për falsifikim dokumentesh
Policia e Durrësit ka finalizuar operacionin e koduar “Kthimi”. Në kuadër të këtij operacion u bë i mundur arrestimi i tre personave nën akuzën se kanë përvetësuar 5000 m² tokë të një qytetari, duke e regjistruar në hipotekë si pronë të tyren.
Policia informon se mes 3 shtetasve të arrestuar është dhe ish-juristi i hipotekës së Durrësit.
Ndaj të arrestuarve gjykata e Rrethit Gjyqësor, Durrës ka caktuar masën e sigurisë së arrestit me burg. Akuzat që rëndojnë ndaj tyre janë “Shpërdorimi i detyrës” dhe “Falsifikimi i dokumenteve”, kryer në bashkëpunim.
Në njoftimin e policisë bëhet e ditur se të arrestuarit janë: A. I., 60 vjeç, ish-jurist i hipotekës së Durrësit; Z. D., 72 vjeç, dhe F. I., 68 vjeç, banues në Durrës.
Specialistët për Hetimin e Krimeve Ekonomike dhe Financiare të Drejtorisë Vendore të Policisë Durrës, në bashkëpunim me Prokurorinë, po vijojnë hetimet për dokumentimin e rasteve të tjera të kryera nga këta shtetas, si dhe për identifikimin dhe arrestimin e personave të tjerë të implikuar në këtë veprimtari kriminale.
