Kurti: Jabllanoviqit tash duhet me ia thy tehun
Kryetari i Lëvizjes Vetëvendosje, Albin Kurti, ka thënë se nuk do të ndalen protestat derisa të plotësohen dy kërkesat e tyre, që janë shkarkimi i Jabllanoviqit dhe Ligji që e kthen ndërmarrjen “Trepça” në ndërmarrje publike.
Gjatë një tubimi në Podujevë, Kurti ka folur edhe për dy protestat e mbajtura deri tash.
“Ju po e shihni se po na sulmojnë shumë. Po e sulmojnë Vetëvendosjen e po e mbrojnë Jabllanoviqin. Ju e mbani mend çka i tha Rama Vuçiqit në Beograd për Kosovën. E çka i tha Rama Vuçiqit në Beograd, nuk po guxojnë Mustafa e Thaçi t’ia thonë Jabllanoviqit në Prishtinë. Tash duhet me ia thy tehun Jabllanoviqit”, ka thënë Albin Kurti, raporton Koha.net.
“Po na thotë Mustafa që mos t’ua ndien juve se “Trepça” është brenda territorit të Kosovës. Na nuk kemi menduar që Trepça është me rrota edhe me end kah të dojmë. Problemi është kush e shfrytëzon”, ka theksuar ai.
