269 000 tonë mbeturina plastike ndotin oqeanet e botës

Të paktën 269 000 tonë mbeturina plastike lundrojnë në sipërfaqen e oqeaneve të të gjithë botës, sipas një hulumtimi të ekspertëve ndërkombëtarë, i publikuar revistën amerikane PLOS ONE.

Ekspertë nga pesë vende grumbulluan të dhëna nga 24 ekspedita, të cilat janë kryer në periudhën prej gjashtë vitesh 2007-13.

Sipas tyre mbeturinat plastike në oqeane janë në sasi shumë herë më të mëdha nga sa ishte menduar deri tani.

”Në oqeane lundrojnë qese, shishe, lodra, furça dhëmbësh dhe shumë sende të tjera plastike. Mbeturinat plastike janë kërcënim për faunën oqeanike”, thuhet në studim.

Mbeturinat në oqeane mbërrijnë nga lumenjtë dhe nga zonat e ndotura si dhe nga anijet.

Mbeturinat shpesh herë grumbullohen në pesë rrotullime subtropikale, në pjesën veriore dhe jugore të oqeanit Paqësor, në pjesën veriore dhe jugore të oqeanit Atlantik si dhe në Oqeanin Indian.