Ambasadori Hill: Po përpiqem të kuptojë se çfarë me të vërtetë po ndodhë sot në Serbi

Ambasadori amerikan në Beograd, Christopher Hill, ka dhënë një intervistë për Radio Televizionin e Serbisë dy javë pasi mori detyrën e ambasadorit.

Diplomati i karrierës foli për prioritetet e tij në Serbi, marrëdhëniet ShBA-Serbi dhe luftën në Ukrainë, raporton Gazeta Express. Ambasadori Hill tha se po përpiqet të kuptojë se çfarë me të vërtetë po ndodhë sot në Serbi.

“Serbia është një shtet ndryshe se çfarë ka qenë, disa prioritete kanë ndryshuar. Por çfarë di është se njerëzit këtu janë fokusuar në të ardhmë, ashtu siç jam edhe unë”, tha Hill.

I pyetur nëse marrëdhëniet ShBA-Serbi do të vazhdojnë të zhvillohen në drejtimin e duhur, Hill u shpreh se dy shtetet kanë interesa të përbashkëta dhe dy shteteve ju pëlqen liga elitare e basketbollit në SHBA, NBA.

“Përshembull dy shtetet e duam NBA-në. Potenciali i plotë i marrëdhënieve ka ende hapësirë për tu përmbushur, pra mendoj se mund të punojmë së bashku në këtë”, tha ambasadori amerikan.

Ambasadori Hill tha se kriza në Ukrainë është më e thella në Evropë që s’është parë prej vitesh.

“Çfarë kemi parë në Ukrainë çdo ditë është tmerruese, vuajtje e civilëve, shkatërrimi i qyteteve të rëndësishme historike. Sinqersisht s’jam i sigurtë se ku do të çojë kjo, por jam i sigurt se jetojmë në një botë tjetër me atë që ishte para 24 shkurtit”, tha Hill.