Armiqtë në protestë

Kam dalë disa herë me gruan në protestë, jo për të protestuar, por për të parë nga afër agjentët që e kanë kurdisur këtë protestë. Thjesht i bie qark turmës në heshtje, për të gjetur ndonjë serb, grek, turk, iranian, kinez, korean, rus, me mendimin se do t’i hidhem në fyt e do ta mbys aty në shesh. Për dreq nuk kam parë asnjë dhe kthehem në shtëpi i mërzitur.

Gruaja shpesh më thotë: “Thuaj ndonjë fjalë, p.sh. ‘Rama në burg, Berisha në burg’, se do të të marrin protestuesit për patronazhist e do të të rrahin.”

Po unë e kam pasur si parim që bëj gjithmonë atë që është kundër asaj që më thotë gruaja.

Kur një natë e nxori kokën armiku, shefi i shërbimit sekret iranian lexoi nja pesë pika. Për dreq, unë isha pikë për pikë me pesë pikat që lexoi armiku… dhe kam ditë që mendohem se kush është armiku ynë i vërtetë. Sot në mëngjes e gjeta, ndaj mendoj t’ua tregoj të gjithë miqve të mi.

1. Armiku ynë i vërtetë është ai që na vjedh pensionin.
2. Armiku ynë i vërtetë është ai që na vjedh pronën.
3. Armiku ynë i vërtetë është ai që na vjedh tokën.
4. Armiku ynë i vërtetë është ai që na vjedh malin.
5. Armiku ynë i vërtetë është ai që na vjedh detin.
6. Armiku ynë i vërtetë është ai që na vjedh liqenin dhe burimin e ujit.
7. Armiku ynë i vërtetë është ai që na vjedh minierën.
8. Armiku ynë i vërtetë është ai që na vjedh naftën.
9. Armiku ynë i vërtetë është ai që na vjedh rininë.
10. Armiku ynë i vërtetë është ai që na vjedh portin, aeroportin.
11. Armiku ynë i vërtetë është ai që na vjedh kalatë.
12. Armiku ynë i vërtetë është ai që na vjedh te faturat e ujit e të dritave.
13. Armiku ynë i vërtetë është ai që na vjedh ilaçet.
14. Armiku ynë i vërtetë është ai që na vjedh votën.
15. Armiku ynë i vërtetë është ai që po na vjedh edhe nderin e dinjitetin.

Dhe nuk më harrohet kurrë thënia e Enverit kur thoshte: “T’i ruhemi armikut të brendshëm, se i jashtmi nuk ka ç’na bën.”

Dhe Enveri, si diktator që ishte, e luftonte aq shumë armikun e brendshëm, sa e lidhte pastaj edhe me të jashtmin. Po më duket se thënia e tij jeton edhe kësaj dite, megjithëse kanë kaluar 40 vjet që kur ka ikur.

Për këto mendime që kam unë, gruaja ime ka filluar të dyshojë se jam i lidhur me Hezbollahun.