Pelegrinazhi i bektashinjve në Malin e Tomorit

Kryegjyshata Botërore Bektashiane bëri të ditur se, prej sot e deri më 25 gusht, zhvillohet pelegrinazhi tradicional në Malin e Shenjtë të Tomorit.

Festa e Shenjtë e Bektashinjve mbledh çdo vit në Teqenë e Kulmakut rreth 400–600 mijë pelegrinë nga e gjithë Shqipëria, diaspora dhe bota. Ditët kulmore të pelegrinazhit janë 21, 22 dhe 23 gushti. Teqeja e Kulmakut është përgatitur dhe i ka hapur dyert prej disa ditësh për të pritur pelegrinët që do të bëhen pjesë e festës.

Kryegjyshata bëri të ditur se, janë marrë të gjitha masat që në Malin e Tomorit të mos mungojnë çadrat për pelegrinët, ndriçimi, uji i pijshëm dhe banjat. Zakonisht, besimtarët ngrenë çadra në këtë vend të shenjtë, kryejnë kurbanin e festës dhe ngjiten në këmbë deri në majën e Tomorit, në lartësinë 2 416 metra mbi nivelin e detit.

Mali i Tomorit konsiderohej si i shenjtë që prej lashtësisë, kur i referoheshin si “mali i perëndive”. Aktualisht është një nga vendet më të rëndësishme të bektashizmit. Pelegrinazhi është i përqendruar te përkujtimi i Abaz Aliut, një figurë e shenjtë në besimin bektashian, i cili konsiderohet simbol i drejtësisë, sakrificës dhe besimit të fortë.