Avokati i Popullit rekomandim Drejtorisë së Burgjeve: Rrisni numrin e policëve
Avokati i Popullit, Igli Totzani i ka kërkuar Drejtorisë së Burgjeve rritjen e numrit të policëve. Në një rekomandim dërguar këtij institucioni, Avokati i Popullit shprehet se ka mbipopullim të burgjeve çka sjell edhe nevojën e rritjes së numrit të policëve të burgjeve.
Avokati i Popullit thotë gjithashtu se policët aktualë kanë 6 vjet pa uniforma, ndërsa nuk trajtohen me ushqim falas prej rreth 9 vitesh. Kjo gjë sipas AP rëndon gjendjen ekonomike të tyre.
“Të rritet numri i policëve të burgjeve. Policët në burgje 6 vjet pa uniforma dhe janë pa ushqim falas prej rreth 9 vjetësh. Mosdhënia e ushqimit rëndon gjendjen ekonomike”, thuhet në rekomandimin e AP. Gjithashtu Avokati i Popullit vëren se në burgje ka shkelje, padrejtësi e cenim të të drejtave, ndërsa rendit edhe disa prej shkeljeve të të drejtave të gardianëve.
“Nuk paguhet leja vjetore e pakryer për nevoja pune. Vjetërsia e punonjësve të burgjeve në punë nuk paguhet. Të merren masa për ndryshimin e situatës. Policët e burgjeve të trajtohen si policët e rendit”, thekson AP. Rekomandimi i tij ka ardhur pas ankesës së një grupi policësh të burgjeve.
