Basha: Do të rikthejmë lirinë e votës, duke shkëputur lidhjet e politikës me krimin

Pas mbledhjes së grupit parlamentar të Partisë Demokratike, kreu i kësaj force Lulzim Basha dha një deklaratë të shkurtër për mediat, ku tha se grupi që ai udhëheq është i vendosur të këpusë hallkat lidhëse të krimit me politikën, si dhe për rikthimin e lirisë së votës në vend.

Sipas Bashës, problemi i blerjes së votës përmes bashkëpunimit të politikës me kartelin e drogës është një problem kombëtar dhe jo vetëm i Partisë Demokratike.

“Konkluzioni i grupit në raport me atë që duhet të bëjmë nesër, është ajo që e dinë të gjithë qytetarët, se aleanca e politikës me krimin dhe në veçanti bashkëpunimi i kartelit të drogës me Edi Ramën shkatërruan procesin politik në zgjedhjet e Dibrës. Ky është një problem jetik për të gjithë Shqipërinë dhe jo vetëm PD-në dhe opozitën. Grupi tregoi vendosmëri të plotë dhe të gjithanshëm, siç unë e kam shpallur. Vendosmërinë e PD-së për të këputur hallkën lidhëse të krimit me politikën, që e ka futur Shqipërinë në një situatë të paprecedentë. Hapat e mëtejshëm që do të diskutojmë, aksioni politik me qytetarët dhe aleatët tanë që do të ndërmarrim, do të na mundësojë që ne t’ia dalim të këpusim këto hallka dhe të rikthejmë lirinë dhe të drejtën e votës”, tha Basha.