Basha: Qeveria të lejojë zbatimin e projektit për mbetjet
Kryebashkiaku Lulzim Basha prezantoi sot para shoqatave mjedisore projektin për menaxhimin e mbetjeve, projekt i cili ndryshon rrënjësisht për 20 vitet e ardhshme mënyrën e mbledhjes dhe trajtimit të mbetjeve në qytetin e Tiranës.
“Sot, duke folur për zgjidhjet dhe politikën tonë afatgjatë të trajtimit të mbetjeve, shpresoj të mund të ngremë ndërgjegjësimin dhe zërin qytetar, që ajo që duhet të jetë politikë për mbetjet, politikë për plehrat, të mos kthehet në politikë me plehrat e të na pengojë në realizimin e synimeve tona”, theksoi Basha.
Ai bëri të ditur se “me mbështetje të plotë politike edhe në Këshillin Bashkiak të Tiranës ne dedikuam afro 150 mijë dollarë ndërsa BB 500 mijë dollarë dhe së bashku mundësuam kreditimin e studimit të fizibilitetit dhe projektit që do i hapte rrugë këtij modeli të ri, projekt i cili u krye nga ekspertët më në zë dhe përvojën më të suksesshme në grupin e ekspertëve ku ka akses BB”.
Basha theksoi se zbatimi i këtij projekti kërkon vullnetin politik të qeverisë i cili deri tani ka munguar. Edhe për këtë projekt nuk kërkohet asnjë lek nga qeveria, kërkohet vetëm autorizimi i Bashkisë së Tiranës të hapë procedurat e koncesionit.
“Kemi mbetur tek vullneti politik. Që Tirana të ketë kontenierë nëntokësorë brenda tre vitesh në të gjithë qytetin, vitin e parë brenda Unazës së Vogël, pa paguar asnjë lek më shumë, as qytetari, as Bashkia, as qeveria. Kërkohet vullneti politik që kjo skemë konçesionare e hartuar me ekspertizën më të mirë botërore të vihet në funksionim. Kërkohet as më pak e as më shumë por bashkëfirmosja sipas ligjit, për të hapur proçedurën konçesionare” – theksoi kryebashkiaku Basha.
