Basha shpreh keqardhje për bllokimin e investimeve nga qeveria
Kryetari i bashkisë së Tiranës, Lulzim Basha, shprehu sot keqardhjen për bllokimin prej 7 muajsh nga kryeministri Rama të investimeve të parashikuara në buxhetin e vitit 2014, në kopshte, çerdhe e shkolla, sikundër dhe investime të tjera të mëdha.
Gjatë përurimit të rindërtimit të kopshtit “Nënë Tereza”, një investim prej 19 milionë lekësh, kreu i bashkisë, deklaroi se “Edi Rama bllokoi me urdhër politik buxhetin e Bashkisë së Tiranës. Ky është një fakt i njohur, pa asnjë justifikim, derisa Gjykata Administrative në nivel Apeli e zhbllokoi atë. Edi Rama, bllokon edhe sot e kësaj dite financimin e bulevardit të ri të Tiranës, një vepër madhore nga e cila përfitojnë të gjithë qytetarët e Tiranës”.
Kryebashkiaku shtoi më tej se Edi Rama, ka bllokuar hapat e mëtejshëm në lidhje me tramvajin e Tiranës, projekti i tramit është gati me ndihmën e qeverisë franceze, pret një garanci sovrane, që iu kërkua Edi Ramës edhe kur ishte në vizitë zyrtare në Francë, dhe e vetmja gjë që nuk ka bërë është të japë këtë garanci sovrane pa të cilën projekti nuk mund të zbatohet.
Duke folur për kopshtin e rikonstruktuar nr. 40, Basha u shpreh se nga 25 fëmijë, sot kemi 120 fëmijë të regjistruar në këtë kopsht dhe kushtet e ndërtimit dhe rindërtimit, janë sipas standardeve europiane. Kjo është puna që flet vetë dhe efektet e së cilës ndihen drejtpërdrejt, tek jeta e qytetarëve të Tiranës dhe tek jeta e vogëlusheve të tyre dhe që na bën krenarë sepse përtej fjalëve, veprat flasin vetë”.
Bashkia e Tiranës ka rindërtuar kopshtin “Nënë Tereza”, duke ofruar kushtet më optimale për afro 120 fëmijët që do ta frekuentojnë atë. Kopshti ka ambiente ndenje, fjetje, loje si dhe sistem ngrohje.
