Basha, takime në Krujë: Papunësi në rritje. PD-ja do ju ofrojë një model të ri
Kryetari i Partisë Demokratike Lulzim Basha është takuar me qytetarë të Krujës dhe fshatrave Murqi, Bilaj, Thumanë, Nikël dhe Fushë-Krujë. Basha u njoh me shqetësimet e banorëve, ku kryesorja ishte papunësia në rritje.
“Situata e vështirë ekonomike ka ulur xhiron e tregtarëve ndërsa taksat, tarifat, gjobat e larta po i falimentojnë bizneset dhe fermerët. Në Krujë tregtarët thonë se e hapin dhe e mbyllin dyqanin pa bërë asnjë xhiro. Mungesa e investimeve në infrastrukturë rrugore dhe bujqësore është problem i madh, i shprehur nga banorët dhe fermerët në zonat rurale”, thotë kreu i opozitës.
Kryetari i PD-së ka theksuar se një model i ri do t’u ofrohet qytetarëve nga Partia Demokratike, ku pushteti është i qytetarëve dhe jo i qeveritarëve.
Ndërsa është njohur me shqetësimet e banorëve të cilët mezi mbyllin muajin, zoti Basha ka kujtuar se paratë e tyre përfundojnë në xhepat e një grupi njerëzish. 1 miliardë euro janë vjedhur vetëm gjatë vitit të kaluar, tha zoti Basha.
