Begaj-Milanoviç: Linjë direkte ajrore mes Shqipërisë dhe Kroacisë

Presidenti i Republikës, Bajram Begaj dhe homologu kroat, Zoran Milanoviç ndanë dje mendimin për vendosjen e një linje direkte ajrore mes Shqipërisë dhe Kroacisë.

“Për një ndërlidhje më të mirë midis dy vendeve, në ndikim të drejtpërdrejtë në fushën e turizmit, ndamë mendimin se ka ardhur koha që të ketë një linjë ajrore direkte midis dy vendeve, apo ndërlidhje midis porteve të dy vendeve”, tha Begaj në konferencën e përbashkët për shtyp me Milanoviç të mbajtur në Kroaci.

Presidenti Begaj u shpreh se, “me presidentin Milanoviç ndamë bindjen se pavarësisht nivelit të shkëlqyer të marrëdhënieve politike dypalëshe dhe prirjes dhe trendit të rritjes të marrëdhënieve ekonomike dhe tregtare, ende mbetet shumë për të bërë në drejtim të bashkëpunimit ekonomik midis dy vendeve. Kuadri ligjor nuk mungon, kështu që vlerësova se në këtë drejtim duhet të bëjmë diçka më shumë”.

“E sigurova Presidentin Milanoviç”, vijoi Begaj, se, “investimet dhe projektet kroate në Shqipëri janë të mirëpritura, veçanërisht në fushën e energjisë, turizmit, ku Kroacia ka një eksperiencë të jashtëzakonshme, po ashtu edhe në fushat e tjera si të infrastrukturës, bujqësisë dhe në fusha që kanë interes reciprok”.

Begaj vuri në dukje gjithashtu se, “vlerësuam se arritja së shpejti e një marrëveshjeje bilaterale për sigurimet shoqërore, do të ndikojë më shumë në forcimin e marrëdhënieve miqësore midis dy popujve tanë”.