Bilanci i Trump për 2018-ën, më pak shpenzime për të varfrit
Administrata Trump, ka prezantuar një propozim për bilancin e vitit 2018 prej 4.100 miliardë dollarë që do të shkurtojë në mënyrë drastike programet për më të varfrit, nga shëndetësia, te shpenzimet dhe bursat universitare si dhe pagesat për personat me aftësi të kufizuara.
Dokumenti propozon një shtim të shpenzimeve ushtarake me 10%, si dhe 2.6 miliardë dollarë për sigurinë e kufijve, përfshirë 1.6 mld dollarë për ndërtimin e murit me Meksikën.
Trump po ashtu ka propozuar që të ndajë 19 mld dollarë për një program të ri të sponsorizuar nga Ivanka, vajza-këshilltare e tij për të siguruar 6 javë pushim prindëror me pagesë.
“Kjo është hera e parë në një kohë të gjatë që një administratë ka përgatitur një buxhet përmes syve të atyre që aktualisht paguajnë taksat”, argumentoi ai Mick Mulvaney, drejtor i buxhetit të Shtëpisë së Bardhë.
Fjalën e fundit mbi aprovimin e bilancit do ta thotë Kongresi dhe nëse nga njëra anë demokratët premtojnë betejë, nga ana tjetër, jo të gjithë republikanët duket se e vlerësojnë një propozim të tillë, që shkel aspektin social.
