Binjakëzim mes Beratit tonë dhe Beratit francez

Ceremonia

Vite më parë, industrialisti beratas, Gazmend Toska, zbuloi se një komunë në Francë mbante emrin Berat. Menjëherë, ai vendosi kontaktet për të vendosur ura bashkëpunimi mes dy qyteteve që mbajnë të njëjtin emër. Për të finalizuar vendosjen e binjakëzimit mes dy qyteteve, një delegacion i Komunës së Beratit në Francë ka zhvilluar dje një vizitë në bashkinë e qytetit të Beratit shqiptar. Kryetari i komunës, Paul Blanc, së bashku me stafin që e shoqëronin, u prit në këtë takim nga kryetari i bashkisë, Fadil Nasufi, drejtues institucionesh që janë në varësi të bashkisë, kryetarë rajonesh etj. Kreu i bashkisë, Nasufi, e njohu kreun e Komunës së Beratit francez dhe stafin e tij me historikun e qytetit, resurset e tij. Një njohje të komunës franceze bëri dhe kryetari i Komunës së Beratit, Blanc. Më pas, në një konferencë për shtyp, dy kryetarët vendorë të njësive me të njëjtin emër, bënë me dije se mundësitë e bashkëpunimit mes tyre janë të mëdha në shumë fusha dhe se janë vendosur urat e bashkëpunimit mes tyre. “Ne vendosim gurin e parë në themelin e bashkëpunimit midis dy Berateve, ky i Shqipërisë dhe Beratit të Francës. Ne do ia lëmë historisë, cili Berat ia ka marrë emrin njëri-tjetrit”, ka deklaruar Blanc. Pas takimit zyrtar nuk munguan shkëmbimi i dhuratave, ndërsa u këndua frëngjisht dhe shqip në një zë.